Tuesday, 29 October 2019 14:41

വൃക്ക

എഴുത്ത്‌: ഡോ. ഷിംന അസീസ്

ബയോളജി ക്ലാസിൽ നൂലിൽ കോർത്ത വലിയ രണ്ട്‌ പയറുമണി പോലെ വരച്ച ഒരവയവത്തെ ഓർമ്മയില്ലേ - വൃക്ക എന്ന കിഡ്‌നി. ശരിക്കും അതിന്‌ ഏതാണ്ടൊരു ചെറിയ മൊബൈൽ ഫോണിന്റെ വലുപ്പം വരും. നമ്മുടെ ആകെ ശരീരഭാരത്തിന്റെ അര ശതമാനം പോലും വരില്ലെങ്കിലും ഹൃദയം പമ്പ് ചെയ്യുന്ന രക്തത്തിന്റെ അഞ്ചിലൊന്നും ഈ രണ്ട്‌ വൃക്കകളിലേക്കാണ്‌ പോകുന്നത്. ഇങ്ങനെ ഒരു ദിവസം നൂറ്റെൺപത് ലിറ്ററോളം രക്തം കിഡ്നിയിലൂടെ കയറിയിറങ്ങി പോവും. അതിൽ നിന്ന് അരിച്ചെടുക്കുന്ന ഒന്നൊന്നര ലിറ്ററാണ് മൂത്രമായി ശരീരം പുറന്തള്ളുന്നത്.

ഇങ്ങനെ രക്തത്തിലെ വേസ്‌റ്റ്‌ അരിച്ചു കളയുന്നതിനു പുറമെ കിഡ്‌നിക്ക് ചെയ്യാൻ വേറെയും കുറേ പണികളുണ്ട് കേട്ടോ. ശരീരത്തിലെ ജലാംശം നിയന്ത്രിക്കാനും, pH നിലനിർത്താനും, രക്തസമ്മർദം നിയന്ത്രിക്കാനും, വൈറ്റമിൻ ഡിയുടെ ആഗിരണത്തിനും, എന്തിന്‌ പറയുന്നു ചുവന്ന രക്താണുക്കളെ നിർമിക്കാൻ പോലും ഈ വൃക്കകൾ തന്നെ കനിയണം. കിഡ്‌നി രോഗം ബാധിക്കുന്ന ഒരാളുടെ പ്രഷർ കൂടുന്നതും, ശരീരം നീര്‌ വെക്കുന്നതും, രക്തക്കുറവ്‌ വരുന്നതുമെല്ലാം ഇത്തരം ജോലികൾ മുടങ്ങുന്നതുകൊണ്ടാണ്.

നമ്മുടെ ശരീരത്തിലെ രണ്ട് കിഡ്നിയും കൂടെ ചെയ്യുന്ന പണി മുഴുവനും ചെയ്യാൻ ശരിക്കും ആരോഗ്യമുള്ള അര കിഡ്നി മതി. അതുകൊണ്ടാണ് ഒരു വൃക്ക ദാനം ചെയ്താലും ശരീരം ഉഷാറായി തന്നെ പ്രവർത്തിക്കുന്നത്. അപ്പോൾ, മൂത്രമുണ്ടാക്കുന്ന ഫാക്‌ടറി എന്ന് വിളിക്കപ്പെടുന്ന കിഡ്നി സിമ്പിളല്ല, നല്ല പവർഫുള്ളാണെന്ന്‌ മനസ്സിലായില്ലേ...

 

വാൽക്കഷ്ണം : വൃക്കക്കൾക്കുള്ളിൽ രക്തം അരിക്കുന്ന അരിപ്പകളെ നെഫ്രോൺ എന്നാണ് വിളിക്കുന്നത്. ഒരു വൃക്കയിൽ ഇത്തരം അരിപ്പകൾ എത്രയെണ്ണമുണ്ടെന്നറിയാമോ? നൂറും ആയിരവുമൊന്നുമല്ല, പത്ത് ലക്ഷത്തിനടുത്ത് !!!

 

Image 1

ലേഖനങ്ങള്‍ എന്ന വിഭാഗത്തില്‍ പ്രസിദ്ധീകരിച്ചത്‌

വര്‍ഷം: 2018, മാസം: June 1st
വാല്യം: 40, ലക്കം: 1

പങ്കിടുക